नव दुर्गा स्तोत्र

1. देवी शैलपुत्री

वंदे वांछितलाभाय चंद्रार्धकृतशेखरां।
वृषारूढां शूलधरां शैलपुत्री यशस्विनीम् ॥

2. देवी ब्रह्मचारिणी

दधाना करपद्माभ्यामक्षमाला कमंडलू ।
देवी प्रसीदतु मयि ब्रह्मचारिण्यनुत्तमा ॥

3. देवी चंद्रघंटा

पिंडजप्रवरारूढा चंदकोपास्त्रकैर्युता ।
प्रसादं तनुते मह्यं चंद्रघंटेति विश्रुता ॥

4. देवी कूष्मांडा

सुरासंपूर्णकलशं रुधिराप्लुतमेव च ।
दधाना हस्तपद्माभ्यां कूष्मांडा शुभदास्तु मे ॥

5. देवी स्कंदमाता

सिंहासनगता नित्यं पद्माश्रितकरद्वया ।
शुभदास्तु सदा देवी स्कंदमाता यशस्विनी ॥

6. देवी कात्यायनी

चंद्रहासोज्ज्वलकरा शार्दूलवरवाहना ।
कात्यायनी शुभं दद्यादेवी दानवघातिनी ॥

7. देवी कालरात्रि

एकवेणी जपाकर्णपूर नग्ना खरास्थिता ।
लंबोष्ठी कर्णिकाकर्णी तैलाभ्यक्तशरीरिणी ॥

वामपादोल्लसल्लोहलताकंटकभूषणा ।
वर्धनमूर्ध्वजा कृष्णा कालरात्रिर्भयंकरी ॥

8. देवी महागौरी

श्वेते वृषे समारूढा श्वेतांबरधरा शुचिः ।
महागौरी शुभं दद्यान्महादेवप्रमोददा ॥

9. देवी सिद्धिदात्रि

सिद्धगंधर्वयक्षाद्यैरसुरैरमरैरपि ।
सेव्यमाना सदा भूयात् सिद्धिदा सिद्धिदायिनी ॥